OTB O‘zbekistonda $3,6 mlrdlik loyihalar amalga oshiradi

O‘zbekistonda Osiyo taraqqiyot banki (OTB) ishtirokida 23 ta yangi loyihani amalga oshiradi. Bu haqda Investitsiyalar, sanoat va savdo vazirligi matbuot xizmati xabar berdi.

2025-yil 6−7 may kunlari Italiyaning Milan shahrida bo‘lib o‘tgan Osiyo taraqqiyot banki Boshqaruvchilar kengashining 58-yillik yig‘ilishida O‘zbekiston delegatsiyasi Bosh vazir o‘rinbosari Jamshid Xo‘jayev rahbarligida ishtirok etdi.

Tashrifning asosiy natijasi — 2025−2026 yillar davomida OTB Boshqaruvchilar kengashi raisi vakolati O‘zbekistonga o‘tishi haqida rasmiy e’lon qilinishi bo‘ldi va Jamshid Xo‘jayev Kengash raisi sifatida tasdiqlandi.

Yig‘ilish yakunlariga ko‘ra, OTB Boshqaruvchilar kengashining 59-yillik yig‘ilishi 2026-yil may oyida Samarqand shahrida o‘tkazilishi haqida yakdil qaror qabul qilindi.

Tadbir doirasida 2025−2026 yillar uchun umumiy qiymati $3,6 mlrd bo‘lgan 23 ta yangi loyihani amalga oshirish dasturi imzolandi.

Loyihalar ta’lim, ichimlik suvi ta’minoti, transport va moliyaviy-texnik yordam sohalari kabi ijtimoiy-iqtisodiy rivojlanishning asosiy yo‘nalishlarini qamrab oladi.

Kapital.uz avvalroq OTB O’zbekistonda iqlim o’zgarishidagi harakatlar dasturi uchun $250 mlnlik kredit ajratishi haqida xabar bergandi.