“O‘zagrosanoatloyiha”ning 94,9% davlat ulushini xususiylashtirish jarayoni davom etmoqda

Davlat aktivlarini boshqarish agentligi “O‘zagrosanoatloyiha” MCHJ ustav kapitalidagi 94,9% davlat ulushini xususiylashtirish jarayoni davom etmoqda. Bu haqda DABA ma’lum qildi. 

Xususiylashtirish jarayoni joriy yil 4-noyabr kuni e’lon qilingan bo‘lib, hozirda qiziqish bildirish (Express of Interest) bosqichi davom etmoqda.  Konsultant sifatida “Abrau Capital” kompaniyasi jalb qilingan. Hozirda 3 ta mahalliy investor qiziqish bildirish to‘g‘risida ariza topshirgan.

Talabgorlar quyida mezonlar asosida o‘rganilib chiqilgan:

• Moliyaviy resurslarning yetarliligi; 
• Jinoiy faoliyat bilan bog‘liq sud jarayonlarining yo‘qligi;
• Xalqaro sanksiyalar va sanksiyalangan shaxslar bilan aloqadorlikning mavjud emasligi.

Konsultant tomonidan taqdim etilgan barcha arizalar yuqoridagi mezonlarga muvofiq baholangan va talabgorlar mos deb topilgan.

Navbatdagi bosqich to‘g‘risida ma’lumot:

• Talabgorlar maxfiylik bitimini (NDA) imzolagan holda virtual ma’lumotlar xonasiga (VDR) kirish imkoniyatiga ega bo‘ladi.
• 2024-yil 23-dekabr soat 18:00 (Toshkent vaqti bilan)ga qadar majburiyatga ega bo‘lgan takliflar (BO) qabul qilinadi.
• Talabgorlar taklifning kamida 1% miqdorida kafolat to‘lovini “E-ausion” platformasida joylashtiradi. Gʻolib bo‘lgan ishtirokchining kafolat to‘lovi sotib olish to‘lovining bir qismi sifatida hisoblanadi.