O‘zbekistonda “Oqilona iste’mol” dasturi yo‘lga qo‘yiladi

Yirik savdo markazlari va oziq-ovqat do‘konlariga kirish joylarida iste’mol muddati tugash arafasida bo‘lgan mahsulotlar rastalarini tashkil etiladi. Bu haqdagi Vazirlar Mahkamasining qarori qabul qilindi.

Qaror bilan umumiy ovqatlanish sohasida oziq-ovqat chiqindilari hosil bo‘lishini kamaytirish va ortiqcha isrofgarchiliklarning oldini olishga qaratilgan “Oqilona iste’mol” (Save food) dasturini amalga oshirish bo‘yicha chora-tadbirlar rejasi tasdiqlandi.

Dasturga ko‘ra, yirik savdo markazlari va oziq-ovqat do‘konlariga kirish joylarida iste’mol muddati tugash arafasida bo‘lgan mahsulotlar rastalarini tashkil etiladi. Iste’mol qilish muddati tugash arafasida bo‘lgan mahsulotlar narxini har 10 kunda pasaytirib boriladi.

2026-yil 1-iyuldan boshlab:

• “O‘zsuvta’minot” AJ tomonidan oqova suvlardagi yog‘-moy mahsulotlari ajratib olinishini ta’minlaydigan yog‘-moy tutgich uskunalari mavjud bo‘lgan umumiy ovqatlanish korxonalariga markazlashgan oqova suv tizimlariga ulanishga ruxsat beriladi;
• umumiy ovqatlanish korxonalarida har oyda kamida bir marotaba yog‘-moy tutgich uskunalarining texnik xususiyatlaridan kelib chiqib, ularni chiqindi yog‘-moylardan tozalash, ushbu chiqindi yog‘-moylarni qayta ishlash va utilizatsiya qilish ta’minlanadi;
• umumiy ovqatlanish korxonalarida oziq-ovqat mahsulotlarini pishirish uchun gaz ta’minoti, ular bo‘lmaganda, yog‘och yoki tayyor ko‘mirdan foydalanishda atmosfera havosini ifloslantiruvchi moddalar va hidlarni ushlab qoluvchi qurilmalarni o‘rnatish choralari ko‘riladi.