“Navoiyuran” daromadi 2025-yilda $1,1 mlrdga yetdi

Navoiy viloyatida joylashgan “Navoiyuran” davlat kompaniyasi 2025-yil yakunlari bo‘yicha dastlabki moliyaviy natijalarini e’lon qildi.

Kompaniya ma’lumotlariga ko‘ra, umumiy tushum $1,1 mlrdni tashkil etib, bu 2024-yilga nisbatan 20,2%ga ko‘pdir. Yakuniy auditdan o‘tgan hisobot 2026-yil may oyida taqdim etilishi rejalashtirilgan.

Moliyaviy ko‘rsatkichlar orasida EBITDA $472 mlnni tashkil etdi, erkin pul oqimi esa qariyb 60%ga oshib, $460 mln darajaga yetdi. Kapital xarajatlar $551 mlnni tashkil etgan bo‘lib, ularning asosiy qismi konlarni o‘zlashtirish, asosiy vositalarni xarid qilish va geologik-qidiruv ishlariga yo‘naltirilgan. Sof qarz hajmi $72 mln darajasida qayd etildi.

Ishlab chiqarish hajmi sezilarli oshdi — uran qazib olish 5,2 ming tonnadan 7 ming tonnaga yetib, 35%ga ko‘paydi. Shu bilan birga, xomashyo zaxiralari 52%ga oshgan. Uran realizatsiyasining o‘rtacha narxi bir funt uchun $69,5ni tashkil etdi.

Kompaniya hozirda Qizilqum va Arnasoy konlarida ishlarni kengaytirmoqda. Rahbariyatga ko‘ra, yangi texnologiyalarni joriy etish global bozorda uranga bo‘lgan talabni qondirish imkonini beradi.

Shuningdek, ishlab chiqarishda kislorodli va karbonatli eritish texnologiyalarini joriy etish orqali tannarxni pasaytirish va ekologik barqarorlikni ta’minlash rejalashtirilgan.