O‘zbekistonda minimal aliment 715 ming so‘mga oshirilishi mumkin

O‘zbekistonda voyaga yetmagan bolalar uchun aliment to‘lovlari tartibini qayta ko‘rib chiqish rejalashtirilmoqda. Bu haqda Oila va xotin-qizlar masalalari qo‘mitasi tomonidan jamoatchilik muhokamasiga qo‘yilgan qonun loyihasida ma’lum qilingan.

Hujjatga ko‘ra, minimal aliment miqdorini 715 ming so‘m etib belgilash taklif etilmoqda. Hozirda bu ko‘rsatkich eng kam ish haqining 26,5 foiziga teng bo‘lib, taxminan 336,8 ming so‘mni tashkil etadi. Yangi tizimda aliment miqdori minimal iste’mol xarajatlariga bog‘lanadi.

Qonun loyihasi ajrim jarayonida bolalar huquqlarini yanada kuchaytirishni ham nazarda tutadi. Endilikda sudlar nafaqat bolaning kim bilan yashashini, balki uni uy-joy bilan ta’minlash masalasini ham hal qilishi mumkin. Shuningdek, bola bilan alohida yashovchi ota-onaning muloqot tartibini rasmiy belgilash rejalashtirilmoqda.

Ota-ona qaramog‘isiz qolgan bolalar uchun bank hisobvaraqlari majburiy ochiladi. Ushbu hisoblarda aliment, pensiya va davlat to‘lovlari jamlanadi va ularning nazorati vasiylik organlari tomonidan olib boriladi.

Islohot zarurati amaldagi tizim har doim ham bolalarning yetarli moddiy ta’minotini kafolatlamayotgani bilan izohlanmoqda. Tadqiqotlarga ko‘ra, ajrimdan so‘ng respondentlarning 55% dan ortig‘i uy-joy, 43% dan ko‘prog‘i esa moliyaviy muammolarga duch kelgan.

Shuningdek, nikoh shartnomasining imkoniyatlari kengaytiriladi — unga bolalarni tarbiyalash va ta’limiga oid bandlar kiritish mumkin bo‘ladi. Ajrim tartibini murakkablashtirish ham rejalashtirilgan, xususan, yarashuv muddati bir yilgacha uzaytirilishi va nikohning birinchi yilida ajrashish uchun ariza berishga cheklov joriy etilishi mumkin.