Sherzodxon Qudratxo‘ja Milliy media assotsiatsiyasi rahbari lavozimini tark etdi

Sherzodxon Qudratxo‘ja O‘zbekiston Milliy media assotsiatsiyasi boshqaruvi raisi lavozimidan ozod etildi. Bu haqda O‘zbekiston Milliy axborot agentligi xabar berdi.

Tashkilotning yangi rahbari etib Odiljon Tojiyev saylandi. U avval Oliy Majlis Qonunchilik palatasi spikerining o‘rinbosari lavozimida ishlab, raqamli rivojlanish va axborot siyosati masalalarini kuratsiya qilgan. Shuningdek, u parlament quyi palatasi deputati hamda Toshkent viloyati kengashi a’zosi sifatida faoliyat yuritgan.

Odiljon Tojiyev ushbu lavozimda 2022-yildan buyon assotsiatsiyani boshqarib kelgan Sherzodxon Qudratxo‘janing o‘rnini egalladi.

Ma’lumotlarga ko‘ra, Sherzodxon Qudratxo‘ja 1974-yilda Toshkent shahrida tug‘ilgan. U O‘zbekiston Milliy universitetining jurnalistika yo‘nalishini tamomlagan.

Mehnat faoliyatini 1996-yilda O‘zbekiston Milliy teleradiokompaniyasida boshlagan. Bu yerda muharrirdan xalqaro dasturlar direktorigacha bo‘lgan lavozimlarda ishlagan. 1999–2008-yillarda esa Markaziy saylov komissiyasi, Vazirlar Mahkamasi hamda Prezident apparati matbuot xizmatlarida faoliyat yuritgan.

2018-yildan buyon u Jurnalistika va ommaviy kommunikatsiyalar universiteti rektori lavozimida ishlamoqda. Shuningdek, u “Xalqaro press-klub”ga rahbarlik qilgan hamda Xalqaro kurash assotsiatsiyasi vitse-prezidenti va Maktabgacha ta’lim vazirligi huzuridagi jamoatchilik kengashi raisi sifatida ham faoliyat yuritib kelmoqda.