Mikromoliya tashkilotlarida muammoli kreditlar ulushi 4% gacha oshdi

2025-yilning dastlabki besh oyida mamlakatimizdagi mikromoliyaviy tashkilotlar (MFT) soni 100 tadan 118 taga ko‘paydi. Bu haqda Markaziy bank ma’lum qilmoqda.

Sohada kredit portfelining umumiy hajmi 7,5 trln so‘mdan 9,1 trln so‘mgacha o‘sdi.

Berilgan kreditlar hajmi bo‘yicha “TezCoin” 2,2 trln so‘mlik portfel bilan yetakchilikni qo‘lga kiritdi. Ikkinchi o‘rinda “Shaffof-moliya” turibdi, uning hajmi deyarli 2,1 trln so‘mga yetib, o‘tgan yilga nisbatan 33% ko‘paydi. Uchinchi o‘rinni 5% o‘sish bilan 1 trln so‘mlik natijaga chiqqan “Fortuna Biznes” egalladi.

Biroq kreditlash hajmining o‘sishi bilan bir qatorda to‘lov intizomi ko‘rsatkichlari ham yomonlashdi. Tarmoqdagi muammoli kreditlar (NPL) ulushi 2,4% dan 4% gacha, ularning hajmi esa 181 mlrd so‘mdan 365,2 mlrd so‘mgacha oshdi.

Muddati o‘tgan qarzlarning eng yuqori ulushi “G‘ijduvon”da qayd etildi (35,5%). Shuningdek, NPLning yuqori darajasi “Kreditomat Toshkent” (33,7%), “Istiqbol Invest Grupi” (32,2%), “Chust Rir” (31,5%), “Kafolat Kredit” (28,6%) va “Laym” (28,5%) tashkilotlarida ham kuzatildi.