Transportda xavfsizlik qoidalarini buzish uchun yangi jarimalar belgilandi

2026-yil 5-fevralda qabul qilingan O‘RQ–1118-sonli Qonun bilan ayrim qonun hujjatlariga o‘zgartirish va qo‘shimchalar kiritildi. Yangi normalar temir yo‘l transporti va metropolitenda harakat hamda tashish xavfsizligi talablarini buzganlik uchun ma’muriy javobgarlikni belgilaydi.

Qonunga muvofiq, temir yo‘l va metropolitenda xavfsizlik qoidalarini buzgan mansabdor shaxslar hamda xizmat xodimlariga bazaviy hisoblash miqdorining 10 baravari miqdorida jarima solinadi. Shuningdek, bunday qoidabuzarliklar bilan bog‘liq hodisalarni yoki ular haqidagi ma’lumotlarni qasddan yashirish ham xuddi shu miqdordagi jarimaga sabab bo‘lishi ko‘zda tutilgan.

Bundan tashqari, avtomobil transporti sohasida ham javobgarlik kuchaytirildi. Jumladan, yo‘lovchilarni tegishli hujjatlarsiz tashish, yo‘l haqi tariflarini asossiz oshirish, tasdiqlangan qatnov jadvaliga rioya qilmaslik yoki belgilangan yo‘nalishdan chetga chiqish holatlari uchun BHMning 3 baravari miqdorida jarima belgilandi.

Mazkur qonun rasmiy e’lon qilingan kundan boshlab uch oy o‘tgach ya’ni 5-maydan kuchga kiradi. Yangi tartiblar transportda xavfsizlikni ta’minlash va yo‘lovchilar huquqlarini himoya qilishga qaratilgan.