O’zbekistonda metan va propan narxi oshdi

O’zbekistonda ba’zi yoqilg’i quyish shoxobchalarida metan narxi 3950-4250 so’mga yetdi, boshqa hududlarda esa gaz hali ham eski narxda sotilmoqda.

Keskin o’sish propanga ham ta’sir qildi: uning narxi ikki oy ichida 44%ga oshdi. 1 iyunga qadar metanning eng yuqori narxi 3350 so’mni tashkil etdi.

Moliya vazirligining ma’lum qilishicha, endi tadbirkorlar yoqilg’i narxini o’zlari belgilaydilar.

O’zbekiston Respublikasi tovar-xomashyo birjasida (UzEx) iyun oyi boshidan beri suyultirilgan gaz (propan) narxi iyul oyi oxiriga kelib tonnasiga 5,2 mln so’mdan 7,5 mln so’mgacha ko’tarildi, bu oy davomida 25%ga, ikki oyda 44%ga oshdi.

Iyul oyi boshida birjada propan savdosi hajmi 1,2 dan 1,6 ming tonnagacha bo’lgan, ammo 15 iyuldan 800 tonnagacha kamaygan.

Eslatib o’tamiz, 1 avgustdan boshlab yengil avtomobillar uchun metanning chakana narxi chegarasi bekor qilindi, bundan oldin u kubometr uchun 3,7 ming so’mni tashkil etdi.