“MMC Corporation” korporatsiyasi O‘zbekiston-Malayziya sanoat zonasini tashkil etadi

O‘zbekiston elchixonasida “MMC Corporation” korporatsiyasining Strategiya va investitsiya masalalari bo‘yicha direktori Najib Ramli bilan uchrashuv bo‘lib o‘tdi, Bu haqda “Dunyo” axborot agentligi ma’lum qildi.

Najib Ramli korporatsiya bosh direktori Che Xalibning shu yil 5-fevral kuni Kuala-Lumpurda o‘tkazilgan O‘zbekiston-Malayziya biznes-forumi yakunida davlatimiz rahbari bilan muloqoti respublikada aniq loyihalarni amalga oshirish uchun muhim turtki bo‘lganligini ma’lum qilgan.

Jumladan, korporatsiya respublikada O‘zbekiston-Malayziya sanoat zonasini tashkil etish va boshqarishni rejalashtirmoqda.

Malayziya tomoniga O‘zbekiston-Malayziya sanoat zonasini joylashtirish uchun yer maydoni va uning birlamchi infratuzilma bilan ta’minlanganlik holati to‘g‘risida taqdimot qilindi.

Shuningdek, mamlakatimizdagi maxsus sanoat zonalari turlari, ularda investorlar uchun taqdim etilayotgan imtiyozlar to‘g‘risida batafsil ma’lumot berildi.

Korporatsiya vakili O‘zbekiston-Malayziya sanoat zonasini tashkil etish imkoniyatlarini batafsil o‘rganish uchun yaqin kunlarda mutaxassislardan iborat ishchi guruhni O‘zbekistonga tashrif buyurishni ma’lum qildi.

“MMC Corporation” 1911-yilda tashkil etilgan. Bugungi kunida mazkur korporatsiya portlar va logistika, energetika, qurilish va muhandislik, sanoat industrial rivojlanish sohalariga ixtisoslashgan bir qancha korxonalarni birlashtiradi.