Markaziy bank qarorlarni tezkor qabul qilish uchun yangi vakolat oladi

O‘zbekiston Markaziy banki o‘zining normativ-huquqiy hujjatlarini Adliya vazirligi va Savdo-sanoat palatasi bilan majburiy kelishmasdan e’lon qilish huquqini olishni rejalashtirmoqda. Bu haqda Markaziy bank raisi Timur Ishmetov moliya sektorini baholash dasturi (FSAP) natijalariga izoh berish vaqtida ma’lum qildi.

Markaziy bankda qayd etilishicha, amaldagi tartib regulyator qarorlarini tezkor qabul qilishga to‘sqinlik qilmoqda. Shu sababli normativ hujjatlarni boshqa idoralar bilan kelishish talabi bekor qilinishi rejalashtirilmoqda.

Tomonlar o‘rtasida ushbu masala bo‘yicha prinsipial kelishuvga erishilgan bo‘lib, kelgusida Markaziy bank hujjatlarni mustaqil ravishda e’lon qilishi mumkin bo‘ladi.

Biroq bu tashabbusni amalga oshirish uchun amaldagi qonunchilikka o‘zgartirish kiritish talab etiladi.

Bu masala faqat ichki hujjatlar bilan emas, balki qonun darajasida ham tartibga solinishi kerak, — dedi Ishmetov.

Markaziy bank ma’lumotiga ko‘ra, tegishli qonun loyihasi hozirda hukumatda ko‘rib chiqilmoqda va keyinchalik parlamentga kiritiladi. Ushbu tashabbus Xalqaro valyuta jamg‘armasi va Jahon bankining FSAP doirasidagi tavsiyalariga ham kiradi.

Regulyator ushbu tavsiyalarni 2026–2027-yillarda to‘liq amalga oshirishni rejalashtirmoqda.