O‘zbekiston 2025-yil mart oyida oltin sotishda yetakchilikni saqlab qoldi

O‘zbekiston Markaziy banki 2025-yil mart oyida yana bir bor oltin bo‘yicha eng yirik sof sotuvchi davlat sifatida yetakchilik qildi. Jahon Oltin Kengashi (WGC) ma’lumotlariga ko‘ra, mamlakat bir oyda 11 tonna qimmatbaho metal sotib, o‘z pozitsiyasini mustahkamladi.

Markaziy banklar tomonidan oltinga bo‘lgan umumiy qiziqish kuchaygan bo‘lishiga qaramay, mart oyidagi jami 35 tonnalik xaridlar 18 tonnalik sotuvlar bilan qisman qoplandi.

Faol xaridorlar orasida Polsha (+16 t), Qozog‘iston (+11 t) va Xitoy (+3 t) yetakchilik qilgan bo‘lsa, O‘zbekiston, Singapur (-5 t) va Qirg‘iziston (-2 t) eng ko‘p sotgan davlatlar bo‘ldi.

2025-yilning I choragida O‘zbekiston jami 15 tonna oltin sotib, boshqa barcha davlatlardan ko‘proq savdo amalga oshirdi. Undan keyingi o‘rinlarda Singapur (-5 t), Qirg‘iziston (-4 t) va Rossiya (-3 t) joylashdi.