O‘zbekistonda mart oyida inflyatsiya 0,6%ni tashkil etdi

2026-yil mart oyida O‘zbekistonda iste’mol narxlari 0,6%ga oshdi. Bu haqda Milliy statistika qo‘mitasi ma’lum qildi.

Oylik inflyatsiya fevral oyidagi darajada saqlanib qoldi, biroq o‘tgan yilning shu davriga nisbatan 0,9% bandga pasaydi. Birinchi chorak yakunlariga ko‘ra, narxlar o‘sishi 1,9%ni tashkil etdi.

Yillik inflyatsiya 7,1% darajasida qayd etilib, o‘tgan yilga nisbatan 3,2% bandga kamaydi va 2017-yildan buyon eng past ko‘rsatkichga tushdi.

Meva-sabzavot mahsulotlarini hisobga olmagan holdagi bazaviy inflyatsiya oylik hisobda 0,5% darajasida saqlanib qoldi. Yillik ko‘rsatkich esa 7,8%ni tashkil etib, o‘tgan yilga nisbatan 1,5 baravardan ko‘proq pasaydi.

Oziq-ovqat mahsulotlari narxlari o‘sishi tezlashib, mart oyida 1,2%ni tashkil etdi (fevralda 0,9%). Shu bilan birga, yillik hisobda oziq-ovqat mahsulotlari narxi 5,6%ga oshib, o‘tgan yilga nisbatan 2% bandga yuqori bo‘ldi.

Nooziq-ovqat mahsulotlari narxlari oy davomida 0,3%ga oshdi, yillik o‘sish esa 5,3%ni tashkil etdi. Xizmatlar narxining o‘sish sur’ati sekinlashib, oylik hisobda 0,2%ni, yillik hisobda esa 12,7%ni tashkil etdi. Bu ko‘rsatkich o‘tgan yilga nisbatan deyarli ikki baravar pastdir.

Hududlar kesimida eng yuqori oylik inflyatsiya Toshkent shahri va Surxondaryo viloyatida — 0,7% darajasida qayd etildi. Boshqa hududlarda bu ko‘rsatkich 0,6%ni tashkil etdi.

Yillik inflyatsiya eng yuqori darajada Farg‘ona viloyatida (7,5%), eng past darajada esa Jizzax viloyatida (6,4%) kuzatildi. Toshkent shahrida yil boshidan buyon narxlar 2%ga, so‘nggi 12 oyda esa 6,9%ga oshgan.