Markaziy bank sentabr oyida 8 ta bankka nisbatan jarima qo‘lladi

Markaziy bank 2025-yil sentabr oyida 9 ta yig‘ilishda jami 43 ta masalani ko‘rib chiqdi.

Shulardan 28 tasi ro‘yxatga olish va ruxsat berish yo‘nalishiga oid bo‘lib, yangi mikromoliya tashkilotlarini ro‘yxatdan o‘tkazish, banklar ustaviga o‘zgartirishlar kiritish, auditorlik sertifikatlarini berish va bank rahbariyatiga nomzodlarni ko‘rib chiqish kabi masalalarni o‘z ichiga oldi.

Shuningdek, 15 ta masala kredit tashkilotlarining moliyaviy holati, prudensial me’yorlarga rioya etilishi, inspeksiya natijalari hamda jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish bilan bog‘liq bo‘ldi.

Natijada prudensial talablarni buzganligi sababli 7 ta bank va 13 ta to‘lov tashkiloti ogohlantirildi, 8 ta bank esa qonunchilik qoidalarini buzganlik uchun jarimaga tortildi.

Eslatib o’tamiz, regulyator avgust oyida 9 ta bankka nisbatan jarima sanksiyalari qoʻllagan edi. Shuningdek, 6 ta mikromoliya tashkiloti va 4 ta lombardga ham bunday choralar koʻrilgan.