Markaziy bank to‘lov tashkilotlari uchun kiberxavfsizlik talablari kuchaytirilganini ma’lum qildi

O‘zbekiston Respublikasi Markaziy banki to‘lov tizimlari operatorlari va to‘lov tashkilotlari faoliyatini litsenziyalash tartibiga o‘zgartirishlar kiritdi. Tegishli hujjat Lex.uz portalida e’lon qilindi.

Yangi qoidalarga muvofiq, bozor ishtirokchilari o‘z axborot tizimlarining kiberxavfsizligini ta’minlashi va axborotni himoyalash bo‘yicha ichki siyosatni shakllantirishi shart. Hujjatda xizmatlar barqarorligini ta’minlash maqsadida shubhali, jumladan firibgarlik operatsiyalariga qarshi qat’iy talablar belgilangan.

Endilikda litsenziya olish jarayonida kompaniyalar firibgarlik xavflarini kamaytirish hamda foydalanuvchilarning shaxsiy ma’lumotlaridan noqonuniy foydalanishning oldini olish bo‘yicha ko‘riladigan choralar yuzasidan batafsil ma’lumot taqdim etishi lozim. Shuningdek, axborot maxfiyligiga ta’sir ko‘rsatishi mumkin bo‘lgan tahdidlarni chuqur baholash majburiy etib belgilandi.

Regulyator texnik nosozliklar va xavfsizlikka oid kamchiliklarni bartaraf etish uchun aniq muddatlarni belgiladi. Agar tizimdagi nosozliklar yoki xavfsizlik bo‘yicha buzilishlar birinchi ogohlantirishdan keyin 3 oy ichida bartaraf etilmasa, operatorlarga nisbatan tegishli choralar qo‘llaniladi.

Qayd etilishicha, yangi normalar Savdo-sanoat palatasi hamda Tadbirkorlar huquqlarini himoya qilish bo‘yicha vakil bilan kelishilgan.