2026-yildan O‘zbekistonda davlat xaridlarida majburiy ekologik mezonlar qo‘llaniladi

2026-yil 1-yanvardan boshlab O‘zbekistonda ekologik mezonlar eng yaxshi takliflarni tanlashda xarid hujjatlarining majburiy qismiga aylanadi. Bu haqda Adliya vazirligi xabar qilmoqda.

Hukumatning 2025-yil 18-iyundagi 371-sonli qaroriga ko‘ra, mamlakatda “yashil” davlat xaridlari tizimi bosqichma-bosqich joriy etiladi. 2030-yilga kelib bunday xaridlarning ulushi 30% ga yetishi lozim.

Tender ishtirokchilariga mahsulotning ekologik belgilanishini tasdiqlovchi har bir hujjat uchun qo‘shimcha 5% ball beriladi. Bunda, ayrim talablarga mos kelmasligi ariza rad etilishiga asos bo‘lmaydi.

Davlat buyurtmachilari 2026-yil uchun xarajatlar tarkibida “yashil” xaridlarning kamida 15% ini ta’minlashlari va bu ko‘rsatkichni har yili kamida 5% ga oshirib borishlari shart.