O‘zbekiston Vashington bilan “Lukoyl” aktivlari bo‘yicha muzokaralar olib bormoqda

Energetika vaziri Jo‘rabek Mirzamahmudovning aytishicha, O‘zbekiston AQSH bilan Rossiya korporatsiyasining respublikadagi loyihalarining keyingi taqdirini muhokama qilmoqda. Bu haqda vazirlik rahbari Oliy Majlis Qonunchilik palatasi deputatlari oldidagi chiqishida ma’lum qildi.

Amaldorning so‘zlariga ko‘ra, Amerika tomoni vazirlikka rasmiy xat yuborgan. Hujjatda neft-gaz kompaniyasining xorijiy bo‘linmalarini sotish uchun ajratilgan muddatni 2026-yil yanvar oyining 17- sanasiga qadar uzaytirish haqida so‘z boradi.

Mirzamahmudov, shuningdek, hukumat yuzaga kelgan vaziyatdan chiqishning davlat milliy manfaatlari va xalqaro huquq normalariga javob beradigan yo‘lini topishga umid qilayotganini ta’kidladi.

Ayni paytda ushbu masala bo‘yicha professional yuristlarni va AQSh hukumati vakillarini jalb qilgan holda faol maslahatlashuvlar davom etmoqda.

Eslatib o‘tamiz, sanksiyalar joriy etilgandan so‘ng, kompaniya operasion faoliyatni saqlab qolish uchun xalqaro aktivlarni sotish niyatini e’lon qildi. Jarayon AQSHning OFAC regulyatori lisenziyasining bir qismi sifatida amalga oshiriladi, kompaniya “Gunvor” kabi potensial xaridorlarning takliflarini ko‘rib chiqishni boshlagan. Ammo tez orada shveytsariyalik savdogar Rossiya gigantining xalqaro biznesini sotib olish taklifini qaytarib oldi. Savdo AQSH Moliya vazirligining Rossiya federatsiyasi hukumati bilan aloqada bo‘lganlikda gumon qilinganligi sababli shartnomani lisenziyalashni rad etgan bayonotidan so‘ng buzildi.

Cheklovlarning joriy etilishi va xorijiy loyihalar bilan bog‘liq muammolar “Lukoyl”ning kapitallashuviga salbiy ta’sir ko‘rsatdi. Kompaniyaning bozor qiymati qariyb $10 mlrdga kamaydi va aksiyalar so‘nggi ikki yarim yil ichida investorlarning xavotirlari fonida eng past darajaga yetdi.