Yirik investitsiya loyihalari majburiy korrupsiyaga qarshi tekshiruvdan o‘tkaziladi

Hukumat investitsiya dasturlarida raqobat va shaffoflikni ta’minlash tartibini tasdiqladi

Фото: Абдумавлон Мадмусаев / Kapital.uz

O‘zbekistonda yirik investitsiya dasturlarini amalga oshirish jarayonida korrupsiyaga qarshi nazorat va raqobat muhitini ta’minlash bo‘yicha yangi tartib joriy etildi. Bu haqda Adliya vazirligi matbuot xizmati ma’lum qildi.

Hukumatning 2026-yil 3-fevraldagi 44-son qarori bilan muhim iqtisodiy loyihalarni amalga oshirishda majburiy nazorat mexanizmlari belgilandi. Hujjat loyihalarni tayyorlash va tasdiqlash jarayonida huquqbuzarliklarning oldini olish hamda bozor muvozanatini saqlashga qaratilgan.

Yangi reglament davlat byudjeti va maqsadli jamg‘armalar hisobidan moliyalashtiriladigan loyihalarga, davlat-xususiy sheriklik asosida amalga oshiriladigan tashabbuslarga, shuningdek, xorijiy investitsiyalar va xalqaro moliya institutlari ishtirokidagi, imtiyoz va davlat kafolatlari beriladigan dasturlarga tatbiq etiladi.

Qoidalarga muvofiq, vazirlik va idoralarning ichki korrupsiyaga qarshi nazorat bo‘linmalari loyiha hujjatlarini bevosita ekspertizadan o‘tkazadi. Ushbu tekshiruv kelishuv jarayonining majburiy bosqichiga aylanadi.

Tekshiruv yakunlariga ko‘ra, loyiha tashabbuskorlari va nazorat organlari birgalikda raqobat muhitiga salbiy ta’sirlarni kamaytirish hamda xatarlarni bartaraf etish bo‘yicha maxsus choralar rejasini ishlab chiqadi.