Soliq qo‘mitasi “Lactalis”ning milliardlik jarimasini bekor qildi

O‘zbekiston Soliq qo‘mitasi “Lactalis” Central Asia kompaniyasiga Soliq kodeksining 227−1-moddasi asosida belgilangan 5,4 mlrd so‘mlik jarimani bekor qildi. Bu haqda qo‘mita raisi Sherzod Kudbiyev tadbirkorlar bilan uchrashuvda ma’lum qildi.

Jarimaga asos bo‘lgan sabab soliq tekshiruvi paytida aniqlangan 1,5 mln so‘mlik qadoqlangan suv kamomadi edi. Qoidabuzarlik majburiy raqamli markirovkalash talablariga rioya etmaslik sifatida baholanib, choraklik daromadning 2%i miqdorida jarima belgilangan edi.

Biroq 27-iyun kuni kompaniya jazo nomutanosib ekanligini ta’kidlab, e’tiroz bildirdi. Xizmat tekshiruvi natijasida jarima haqidagi qaror yetarli dalillarsiz qabul qilingani ma’lum bo‘ldi. Ushbu masala hududiy soliq organlari rahbarlari ishtirokida jamoaviy muhokamaga qo‘yildi.

Yig‘ilish yakunida jarima bekor qilinib, soliq xizmati organlari faoliyatida yo‘l qo‘yilgan kamchiliklar yuzasidan tashkiliy choralar ko‘rildi. Kudbiyev bunday miqdordagi undirish ortiqcha ekanini ta’kidlab, Soliq nizolarini sudgacha hal qilish boshqarmasiga ishni qayta ko‘rib chiqish va dalolatnomani tuzgan inspektorni tinglashni topshirdi.