Fitch Ratings agentligi “Kapital Sug‘urta“ reytingini “B-” darajasiga pasaytirdi

Fitch Ratings agentligi “Kapital Sug‘urta” AJ sug‘urta kompaniyasining moliyaviy barqarorlik reytingini (IFS) “B” darajasidan “B-” darajasiga tushirdi va “Barqaror” prognozini belgiladi.

Reytingning pasaytirilishi “Kapital Sug‘urta” biznesining oshgan tavakkalchiligi, diversifikatsiyaning kamayishi, kapitalizatsiyaning zaiflashishi, moliyaviy ko‘rsatkichlarning sustligi hamda yuqori investision va rezerv xavflari bilan bog‘liq bo‘ldi.

Agentlik kompaniyaning biznes xavf profili yomonlashganini, bunga sabab u moliyaviy tavakkalchilik bilan bog‘liq mahsulotlarga ko‘proq e’tibor qaratayotganini qayd etdi.

Xususan, 2024-yilda to‘lovga layoqatsizlik yoki bankrotlikdan himoya qiluvchi moliyaviy tavakkalchilik sug‘urtasi ulushi brutto mukofotlarda 60% ga, neto mukofotlarda esa 52% ga yetdi. Bu ko‘rsatkich 2022-yilda mos ravishda 11% va 12% ni tashkil etgan edi.

Bunday strategik yo‘nalish “Kapital Sug‘urta” ning sug‘urta to‘lovlari o‘zgaruvchanligiga ta’sirchanligini oshiradi, ayniqsa, makroiqtisodiy beqarorlik davrida, deya ta’kidladi ekspertlar.