Jahon banki O’zbekistonga iCRAFT loyihasi bo’yicha $7,5 mlnlik birinchi transhni ajratdi

Mablag'lar emissiya savdosini rag'batlantirish, yashil iqtisodiyotni rivojlantirish va energiya samaradorligini oshirishga yo'naltiriladi

Фото: World Bank

Jahon banki energetika sohasidagi islohotlarni qo’llab-quvvatlash uchun O’zbekistonga $7,5 mlnlik moliyaviy paketning birinchi transhini taqdim etdi, deya xabar beradi iqtisodiyot va moliya vazirligi.

Ushbu mablag’lar emissiya savdosi, yashil iqtisodiyotni rivojlantirish va energiya samaradorligini oshirishga qaratilgan.

Moliyalashtirish joriy yilning may oyida e’lon qilingan issiqxona gazlari monitoringi tizimini yaratish, «O’zenergosotish» va energetika bozorini rivojlantirish va tartibga solish agentligi faoliyatini qo’llab-quvvatlash hamda muhtoj oilalar uylariga quyosh panellarini o’rnatish uchun sarflanadi.

Uglerod resurslaridan foydalanishga qaratilgan iCRAFT loyihasini moliyalashtirish o’tgan iyul oyida tasdiqlangan. Shartnomaga ko’ra, Jahon banki O’zbekiston hukumatiga 2028 yilgacha $46,25 mln beradi.