2025-yilga borib IT Park rezidentlari soni 3 mingga yetadi

Yil oxiriga qadar rezidentlar tomonidan 20 trln so‘mlik xizmat ko‘rsatish rejalashtirilmoqda

Фото: Абдумавлон Мадмусаев / Kapital.uz

2025-yil oxirigacha IT Park rezidentlari sonini 3 mingga yetkazish rejalashtirilmoqda. Bu haqda 9-yanvar kuni muhokamaga qo‘yilgan davlat dasturida belgilangan.

Shundan kamida 250 ta kompaniya eksport xizmatlarini taqdim etishi, jumladan, 50 tasi xorijiy kapital ishtirokidagi korxonalar bo‘lishi kutilmoqda.

Yil yakuniga qadar IT Park rezidentlari tomonidan ishlab chiqilgan dasturiy mahsulotlar va xizmatlar qiymati 20 trillion so‘mga yetishi prognoz qilinmoqda. Shu bilan birga, dekabr oyigacha ularning faoliyatiga to‘sqinlik qilayotgan muammolar aniqlanib, ularni bartaraf etish bo‘yicha takliflar ishlab chiqiladi.

2024-yil uchinchi choragi yakunlariga ko‘ra, IT Parkda 2,4 mingdan ortiq rezident ro‘yxatdan o‘tgan.