Ilon Mask OpenAI va Microsoftdan $134 mlrdgacha tovon puli talab qilmoqda

Amerikalik tadbirkor Ilon Mask OpenAI va Microsoft kompaniyalariga qarshi sud da’vosi bilan chiqib, ulardan $134 mlrdgacha tovon puli undirishni talab qildi.

Da’voga ko‘ra, Ilon Mask 2015-yilda OpenAI’ni tashkil etishda asosiy hammuassis va investor bo‘lgan hamda kompaniyaning dastlabki rivojida muhim rol o‘ynagan. Uning ta’kidlashicha, OpenAI keyinchalik notijorat missiyasidan chekinib, Microsoft bilan tijorat manfaatlariga asoslangan hamkorlikka o‘tgan.

Mask OpenAI va Microsoftning ushbu hamkorligi natijasida milliardlab dollar daromad olinganini, biroq bu jarayonda dastlabki kelishuvlar va ochiq manba tamoyillari buzilganini da’vo qilmoqda. Shu bois u kompaniyalar tomonidan olingan “noqonuniy foyda”ni qaytarishni talab qilmoqda.

OpenAI mazkur da’voni asossiz deb baholab, uni kompaniyaga bosim o‘tkazishga urinish sifatida talqin qilgan. Microsoft esa hozircha rasmiy izoh bermagan.

Ma’lumotlarga ko‘ra, sud jarayoni 2026-yil aprel oyida AQShning Kaliforniya shtatida ko‘rib chiqilishi rejalashtirilgan.