ILMA kapital bozorini isloh qilish uchun qonun loyihasini taqdim etdi 

Istiqbolli loyihalar milliy agentligi (ILMA) kapital bozorini yaxshilashga qaratilgan qonun loyihasini e’lon qildi. Qonun loyihasi bo‘yicha muhokamalar 2025-yil 13-yanvarda boshlanib, 28-yanvargacha davom etadi.

Loyihaga ko‘ra, investitsiya vositachilari har chorakda openinfo.uz saytida moliyaviy hisobotlarini e’lon qilish majburiyatini oladi.

Shuningdek, ustav kapitali bosqichma-bosqich oshiriladi:

• 2026-yil 1-yanvargacha – BHMning 1000 barobari (375 mln so‘m);
• 2026-yildan – BHMning 3000 barobari (1,1 mlrd so‘m);
• 2027-yildan – BHMning 4000 barobari (1,5 mlrd so‘m);
• 2028-yildan – BHMning 6000 barobari (2,2 mlrd so‘m).

Qonun loyihasida emitentlar tomonidan openinfo.uz saytida ma’lumotlarni e’lon qilishni kechiktirganlik uchun jarimalar joriy etilishi ko‘zda tutilgan. Ma’lumotlarni chop etishni har bir kechiktirilgan kun uchun jarima miqdori BHMning 50% ini (187 500 so‘m) tashkil etadi.

Bundan tashqari, jarima to‘lanmaguncha yoki kamchilik bartaraf etilmaguncha, agentlik platformaga kirishni cheklash huquqiga ega.

Jarimalardan tushgan mablag‘larning 80%i davlat byudjetiga, qolgan 20%  esa ILMA ixtiyorida qoldiriladi.