Markaziy bank ikkita to’lov tashkiloti litsenziyasini bekor qildi

Markaziy bank to’lov tashkiloti faoliyatini amalga oshirish uchun «Milliy Pochta To’lovlari» va to’lov tizimi operatori faoliyatini amalga oshirish uchun mo’ljallangan «Qulay Pul» litsenziyalarini bekor qilish to’g’risida qaror qabul qildi. Bu haqda regulyatorning saytida xabar berilgan.

Ushbu harakatlar kompaniyalarning litsenziyalarni ixtiyoriy ravishda bekor qilish to’g’risidagi bayonotlari asosida boshlangan.

«Milliy Pochta To’lovlari» 2020-yil 7-aprelda ro’yxatdan o’tgan va 2020-yil 16-mayda litsenziyaga ega bo’lgan. Uning muassisi «O’zbekiston Pochtasi» kompaniyasi bo’lib, ustav fondi 1,5 mlrd so’mni tashkil etadi.

«Qulay Pul» 2019-yil 10-iyunda ro’yxatdan o’tgan va 2021-yil 6-dekabrda litsenziyaga ega bo’lgan. Muassislar Isamiddinov Baxtiyor Nizomiddinovich (30%), Nasochevskiy Viktor (50%) va «Migrant» kompaniyasi (20%) hisoblanadi. Ustav fondi esa 10 mlrd so’mni tashkil etadi.