Toshkent IIBB Otabek Bakirov ustidan jinoyat ishi qo‘zg‘atishni rad etdi  

Toshkent shahar Ichki ishlar bosh boshqarmasi iqtisodchi Otabek Bakirovga nisbatan jinoyat ishi qo‘zg‘atishni rad etdi. Bu haqda Bakirovning o‘zi Telegram kanalida xabar berdi.

Qarorda aytilishicha, ekspertiza vazirning shikoyatini asosli deb topmagan va post e’lon qilinganidan beri 1,5 yildan ko‘proq vaqt o‘tgan.

Avvalroq Kapital.uz saytida xabar berilishicha, O‘zbekiston energetika vaziri Jo‘rabek Mirzamahmudov Otabek Bakirovga qarshi prokuratura va Ichki ishlar vazirligiga shikoyat kiritgan edi.

Shikoyatga Bakirovning Toshkent shahri Olmazor tumani va Toshkent viloyatining ayrim hududlarini elektr energiyasi bilan ta’minlovchi «Sag‘bon» podstansiyasi holati haqidagi fikrlari sabab bo‘lgan.

Vazir bu postda haqorat va obro‘sizlantiruvchi bayonotlar mavjudligini aytib, muallifga nisbatan chora ko‘rishni talab qilgan. Ushbu post 2023-yil 5-iyun kuni e’lon qilingan edi.

Bakirovning qo‘shimcha qilishicha, shikoyat vazirning Lolazor podkastida qatnashganidan olti kun o‘tib topshirilgan, unda Bakirovning o‘zi ham ishtirok etgan edi. U vazirning bu harakatlarini tanqidni bostirish va energetika sohasida senzura o‘rnatishga urinish sifatida baholadi. Bakirovning ta’kidlashicha, vazir mavjud muammolarni hal qilish o‘rniga shunday harakatlarga qo‘l urgan.