O‘zbekistonda haydovchilar uchun jarima ballari tizimi joriy etilmoqda

Endilikda O‘zbekistonda yo‘l harakati qoidalarini buzganlik uchun asosiy jazoga qo‘shimcha ravishda jarima ballari ham hisoblanadi. Bu haqda Adliya vazirligi xabar berdi.

Ma’muriy javobgarlik to‘g‘risidagi Kodeksga kiritilgan o‘zgartirishlarga ko‘ra, agar haydovchi bir yil ichida 12 balldan ortiq to‘plasa, u transport vositasini boshqarish huquqidan mahrum qilinadi.

Bitta qoidabuzarlik uchun maksimal jarima ballari 2 balldan oshmaydi. Barcha hisoblangan ballar birinchi qoidabuzarlik sodir etilgan kundan boshlab bir yil davomida hisobga olinadi va bu muddat tugagandan so‘ng avtomatik tarzda bekor qilinadi. Biroq, agar haydovchi bir yil ichida 12 balldan ortiq to‘plasa, u kamida 6 oy muddatga haydovchilik guvohnomasidan mahrum qilinadi.

Bundan tashqari, gaz va dizel yoqilg‘isida harakatlanadigan transport vositalaridan foydalanish qoidalarini buzish, yo‘lovchilarni tashish talablariga rioya qilmaslik, quvib o‘tish qoidalarini buzish va tajovuzkor haydovchilik uchun ma’muriy javobgarlik joriy etildi.

Shuningdek, huquq-tartibot organlari xodimlarini obro‘sizlantirish maqsadida ularning foto va video materiallarini tarqatganlik uchun ham jazo belgilandi.