Shota Rustaveli ko’chasining bir qismini “gastronomik zona”ga aylantirish rejalashtirilmoqda

Joriy yilning 16 sentabr kuni Yakkasaroy tumanidagi “Ateca Hotel Suites” mehmonxonasida Pushkin prospektida joylashgan suv devorli zamonaviy Park loyihasi taqdimoti bo’lib o’tdi. Bu haqda Yakkasaroy tumani hokimligi matbuot xizmati xabar bermoqda.

Tadbirda Toshkent shahar hokimining turizm va madaniyat bo’yicha o’rinbosari Sanjar Tojiyev, Yakkasaroy tumani hokimi Nilufar Allabergenova, “Koç Construction” qurilish kompaniyasi vakillari va ommaviy axborot vositalari vakillari ishtirok etdi.

Parkning zamonaviy uslubdagi loyihasi “Koç Construction” kompaniyasi vakili Bahri Saka tomonidan taqdim etilgan.

Bundan tashqari, Shota Rustaveli ko’chasini 24 soatlik ish rejimiga ega gastronomik ko’chaga aylantirish loyihasi muhokama qilindi. Ushbu hududni mahalliy aholi va sayyohlar uchun jozibali savdo-ko’ngilochar markazga aylantirish rejalashtirilgan. Loyiha doirasida binolarni modernizatsiya qilish, rekonstruksiya qilish va obodonlashtirish ishlari ko’zda tutilgan.

Rejaga 1,6 km uzunlikdagi velosiped yo’lini yaratish, 40 ta zamonaviy skameykalarni o’rnatish, 10 ta joyda nogironlar uchun rampalar o’rnatish va 1,5 km maydonni obodonlashtirish kiradi. Bundan tashqari, to’rtta pandus va chorrahalarda ikkita yer osti o’tish joylarini rekonstruksiya qilish nazarda tutilgan.