O‘zbekiston oltin-valyuta zaxiralari $77,09 mlrdga yetdi

O‘zbekiston Respublikasi Markaziy banki hisobotiga ko‘ra, 2026-yil 1-mart holatiga O‘zbekistonning oltin-valyuta zaxiralari $77,09 mlrdni tashkil etdi. Bu 2013-yildan buyon kuzatilayotgan statistik davr uchun rekord ko‘rsatkich hisoblanadi.

Fevral oyida zaxiralar $2 mlrdga (+2,7%) oshdi. Yil boshidan buyon o‘sish $10,8 mlrd yoki 16,2%ni tashkil etdi.

Zaxiralar o‘sishining asosiy omili jahon bozorida oltin narxining ko‘tarilishi bo‘ldi. Bir unsiya narxi $5063,45dan $5174,1gacha (+2,2%) oshdi. Markaziy bank bahosiga ko‘ra, bu omil zaxiralarga taxminan $1,4 mlrd qo‘shimcha berdi. Taqqoslash uchun, noyabrda o‘sish $1,8 mlrd, dekabrda $2,9 mlrd, yanvarda esa $8,6 mlrdni tashkil etgan.

Oltin zaxirasining jismoniy hajmi ketma-ket beshinchi oy davomida ortdi. Fevral oyida u 250 ming troy unsiyaga (7,8 tonna) ko‘payib, 13,08 mln unsiya (406,8 tonna)ga yetdi. Bu ham rekord daraja hisoblanadi.

Narxlarning oshishi fonida oltin zaxiralari qiymati $2,7 mlrdga ko‘payib, tarixiy eng yuqori ko‘rsatkich — $67,7 mlrdga yetdi. Oltin umumiy zaxiralarning qariyb 87,8%ini tashkil etmoqda.

Zaxiralarning valyuta qismi fevral oyida $685,9 mlnga kamayib, $8,8 mlrdni tashkil etdi. Bu 2025-yil 1-yanvardan beri eng past ko‘rsatkichdir. Qimmatli qog‘ozlar hajmi esa biroz oshib, $1,54 mlrdga yetdi.

Xalqaro standartlarga ko‘ra, O‘zbekistonning zaxiralari darajasi yuqori hisoblanadi. Ular qariyb 20 oylik importni qoplash imkonini beradi. Xalqaro valyuta jamg‘armasi tavsiyasiga ko‘ra, minimal ko‘rsatkich uch oylik import hajmiga teng.