Elektrosamokatlar uchun haydovchilik guvohnomasi talab qilinmaydi — YHXB

Ichki ishlar vazirligi Yo‘l harakati xavfsizligi xizmati matbuot kotibi Zoir Yo‘ldashev ijtimoiy tarmoqlarda elektrosamokatlar uchun haydovchilik guvohnomasi joriy etilgani haqidagi xabarlarni rad etdi.

Uning ta’kidlashicha, ushbu xabarlar Vazirlar Mahkamasining 30-martdagi qarori bilan auto-maktablarni ro‘yxatdan o‘tkazish tartibiga kiritilgan o‘zgartirishlar noto‘g‘ri talqin qilingani ortidan paydo bo‘lgan.

Mazkur o‘zgartirishlarda A1 toifali haydovchilik guvohnomasi haqida so‘z boradi. Bu toifa mopedlar, skuterlar, shuningdek, dvigatel hajmi 25 kub santimetrdan kichik yoki elektr dvigateli quvvati 0,25 kVtgacha bo‘lgan hamda maksimal tezligi 25 km/soatdan oshmaydigan mototransport vositalarini qamrab oladi.

Biroq ushbu talablardan shaxsiy harakatlanish vositalari (SIM) mustasno etilgan. SIM tarkibiga elektrosamokatlar, skeytbordlar, monog‘ildiraklar va shunga o‘xshash vositalar kiradi. Ulardan foydalanish uchun haydovchilik guvohnomasi talab qilinmaydi.

Shu bilan birga, bunday vositalarni boshqarayotgan shaxslar yo‘l harakati qoidalariga rioya qilishi shart. Xususan, ular maxsus ajratilgan yo‘laklarda harakatlanishi, bunday yo‘laklar mavjud bo‘lmaganda esa yo‘l chetidan yurishi kerak.