O’zbekistonda elektromobillarga talab 10 barobar oshdi

Prezident Shavkat Mirziyoyev elektr transport vositalarini ishlab chiqarishni kengaytirish chora-tadbirlari to’g’risida taqdimot bilan tanishdi. Bu haqda davlat rahbarining matbuot xizmati xabar bermoqda.

So’nggi uch yil ichida O’zbekistonda elektromobillar savdosi 10 barobar oshdi. 2023 yilda elektr va gibrid avtomobillar umumiy avtomobil importining 35 foizini tashkil etdi.

Prezident mutasaddilarga elektromobil sanoatida ilgari belgilangan rejalarni kengaytirish va loyihalarni amalga oshirishni jadallashtirish bo’yicha ko’rsatmalar berdi. BYD sheriklarini jalb qilgan holda elektr transport vositalarining tarkibiy qismlarini mahalliylashtirishga alohida e’tibor qaratilmoqda.

Shuningdek, Turin politexnika instituti, muhandislik markazlari, ilmiy institutlar va laboratoriyalarni bog’laydigan integratsiyalashgan tizimni yaratish vazifasi qo’yildi. Ushbu sohaning rivojlanishi bilan mutaxassislar va ishchilarga talab oshishi kutilmoqda.

Kelgusi uch yil ichida bu talab 10 ming kishiga yetishi kutilmoqda. Shu munosabat bilan malakali kadrlar tayyorlashni hozirdan boshlash zarurligi ta’kidlandi. Elektromobillar uchun zaryadlash stansiyalari tarmog’ini rivojlantirish dasturini ishlab chiqish to’g’risida qaror qabul qilindi.