O‘zbekistonda davlat byudjeti daromadlari 144,2 trln so‘mni tashkil etdi

O‘zbekistonda 2025-yilning birinchi yarim yilligida davlat byudjetidan ijtimoiy sohalarga 86,2 trln so‘m yo‘naltirildi. Bu haqda Oliy Majlis Qonunchilik palatasining navbatdagi majlisida ma’lum qilindi.

Ma’lum qilinishicha, ijtimoiy sohalarga yo‘naltirilgan mablag‘ 2024-yilning mos davriga nisbatan 12,1 trln so‘mga ko‘p bo‘lib, jami xarajatlarning 49,8% ini tashkil etdi.

Umuman, hisobot davrida Davlat byudjeti daromadlari 144,2 trln so‘mni tashkil etib, o‘tgan yilning shu davriga nisbatan 19,2% ga oshdi va deyarli barcha soliq turlari bo‘yicha belgilangan reja ko‘rsatkichlari to‘liq bajarildi.

Shu bilan birga, byudjet xarajatlari 173,3 trln so‘mni tashkil etib, o‘tgan yilning shu davriga nisbatan 16% ga o‘sgan.

Bunda, ijtimoiy barqarorlikni ta’minlash, aholi turmush darajasini oshirish hamda fuqarolar uchun munosib sharoitlar yaratish davlat moliyaviy siyosatining ustuvor yo‘nalishlaridan biri sifatida saqlanib qolayotgani deputatlar tomonidan alohida e’tirof etildi.