Centrum Air IPO oldidan $2 mlrdga baholanishi kutilmoqda

Amerikaning Oppenheimer investitsiya guruhi hamda Citibank moliya instituti Centrum Air aviatsiya va transport kompaniyasining fond bozoriga chiqishi jarayonida anderrayter sifatida qatnashadi. Bu haqda Jon Tonelli Vashingtonda Shavkat Mirziyoyevning tadbirkorlar bilan uchrashuvi chog‘ida ma’lum qildi.

IPOga tayyorgarlik doirasida kompaniyaning bozor qiymatini $2 mlrd atrofida baholash rejalashtirilmoqda. Muvaffaqiyatli joylashtirish amalga oshsa, Centrum Air Markaziy Osiyodagi eng qimmat kompaniyalardan biriga aylanishi mumkin. Ta’kidlanishicha, kompaniya IPO orqali $600 mln jalb etishni ko‘zlamoqda, bu esa umumiy bahoning qariyb 30%iga teng.

Amerika tomoni O‘zbekistonni Sharq va G‘arb o‘rtasidagi yirik logistika markaziga aylantirish tashabbuslarini ham qo‘llab-quvvatlash niyatida. Tonellining aytishicha, kompaniya bosh qarorgohini O‘zbekistonda saqlagan holda faoliyat geografiyasini 100 dan ortiq mamlakatga kengaytirishni rejalashtirgan.

Centrum Air biznes modeli aviatsiya, avtomobil va temiryo‘l tashuvlari, shuningdek yuk va yo‘lovchi logistika xizmatlarini o‘z ichiga oladi. Shu bilan birga, Oppenheimer banki Andijon viloyatidagi moliyalashtirish loyihalari ustida ham ish olib borayotgani ma’lum qilindi. Bundan tashqari, yirik amerikalik investor Toshkentda mintaqaviy ofis ochish imkoniyatini ko‘rib chiqmoqda.