Bosh vazir o‘rinbosari bojxona soliqlarini 30% dan ko‘proqqa kamaytirish bo‘yicha topshiriq berdi

Bosh vazir o‘rinbosari Jamshid Xo‘jayev bojxona deklaratsiyasi bilan bog‘liq umumrespublika yig‘imlarini 30% dan ortiq kamaytirish bo‘yicha topshiriq berdi. Bu haqda Navoiy viloyatida tadbirkorlar bilan o‘tkazilgan uchrashuvda ma’lum qilindi.

Uchrashuv davomida “SVS Navoiy” xorijiy korxonasi vakili bojxona operatsiyalari bo‘yicha avval amal qilgan imtiyozlarni qayta tiklash taklifini bildirdi. U bunga eksport salohiyati ortib borayotgan sharoitda biznesni qo‘llab-quvvatlash zarurati bilan izoh berdi.

Ma’lum qilinishicha, 2025-yilda eksportni rasmiylashtirish xarajatlari 50% lik chegirma bekor qilingani sabab oshgan. Eksport va import stavkalarini tenglashtirish Jahon savdo tashkiloti talablariga moslashish maqsadida amalga oshirilgan.

Bojxona qo‘mitasi tomonidan umumiy tariflarni kamaytirish bo‘yicha taklif allaqachon hukumatga kiritilgani ma’lum qilindi. Hozirda ushbu hujjat Prezident administratsiyasida kelishuv jarayonidan o‘tmoqda.

Avval eksportchilar importga nisbatan 50% lik chegirmadan foydalangan. Yagona stavkalar joriy etilgach, biznes zimmasidagi moliyaviy yuk oshdi. Shu sababli yig‘imlarni kamaytirish taklifi ilgari surildi.

Jamshid Xo‘jayev ushbu masalani tizimli hal qilishni topshirdi va o‘zgarishlar bir oy ichida joriy etilishini ma’lum qildi.