Biznes bilan bir tilda gaplashamiz

Har bir muvaffaqiyatli kompaniya ortida nafaqat raqamlar, balki so‘zlar turadi. Ayniqsa, korporativ dunyoda ishlatiladigan murakkab atamalar sizning rejalashtirish, tahlil qilish va yetakchilik qobiliyatingizga bevosita ta’sir qiladi. Shu sababli KSP Consulting bu safar siz uchun korporativ boshqaruv va moliyaviy tahlilga oid atamalarning amaliy lug‘atini tuzdi. Maqsad — og‘ir tuyulgan tushunchalarni oddiy va aniq qilib tushuntirish. Bu lug‘at ish yuritishdan tortib, investorlar bilan muloqotga qadar har bir professional uchun ish quroli bo‘lib xizmat qiladi.

Raqobat ustunligi — kompaniyani boshqa raqobatchilardan ajratib turadigan va bozorda ustunlik beradigan jihatlar

Birlashtirilgan hisobot — kompaniya guruhiga kiruvchi barcha filial va sho‘ba korxonalar moliyaviy natijalarini yagona hujjatda birlashtiruvchi hisobot

Kontent marketing — mijozlarni jalb qilish va brendga sodiqligini oshirish maqsadida foydali axborot yaratish va tarqatish strategiyasi

Kontokorrent hisob — bankda overdraft bilan ishlovchi, qarz va mablag‘lar harakati birga yuritiladigan hisobvaraq

Kontrolling — kompaniya ichki resurslarini samarali boshqarish, byudjet va natijalarni monitoring qilish tizimi

Mojaroni boshqarish — jamoa ichidagi ziddiyatlarni aniqlash, oldini olish va konstruktiv yechimlar topishga qaratilgan boshqaruv yondashuvi

Korporativ madaniyat — kompaniyada mavjud qadriyatlar, odatlar va ish yuritish uslublarining umumiy majmuasi

Ijtimoiy mas’uliyat (CSR) — kompaniyaning jamiyat oldidagi majburiyatlarini anglash va ekologik, ijtimoiy loyihalarda ishtirok etishi

Korporativ strategiya — butun kompaniya faoliyatining uzoq muddatli yo‘nalishlari va ustuvor maqsadlarini belgilovchi reja

Ichki o‘quv tizimi — xodimlarni rivojlantirish va malakasini oshirish uchun kompaniya ichida tashkil etilgan o‘quv jarayonlari

Korporativ boshqaruv — aksiyadorlar, direktorlar kengashi va menejment o‘rtasidagi rollar, majburiyatlar va nazorat tizimini tashkil qilish uslubi

Korporativ moliya — kompaniya kapitali bilan ishlash, investitsiyalarni boshqarish va foyda taqsimoti bilan bog‘liq moliyaviy faoliyat

Bilvosita xarajatlar — mahsulot ishlab chiqarishga bevosita bog‘liq bo‘lmagan, ammo umumiy faoliyatga ta’sir qiluvchi xarajatlar

Tez qoplash koeffitsiyenti — kompaniya qisqa muddatli majburiyatlarini naqd pul va oson likvid aktivlar orqali qoplash qobiliyatini ko‘rsatuvchi ko‘rsatkich

Tez likvidlilik koeffitsiyenti — zaxiralar hisobga olinmagan holda kompaniyaning qisqa muddatli qarzlarini to‘lash imkoniyati

Qarzdorlik koeffitsiyenti — kompaniya moliyaviy strukturasi ichida qarz mablag‘lari ulushini aniqlovchi ko‘rsatkich

Aylanish koeffitsiyenti — kompaniya aktivlari yoki zaxiralarining ma’lum davr ichida necha marta to‘liq aylanishini ko‘rsatadigan moliyaviy indikator

Qarzlarni qoplash koeffitsiyenti — kompaniyaning o‘z majburiyatlarini daromad hisobiga qanday darajada qoplashini baholovchi ko‘rsatkich

Foizlarni qoplash koeffitsiyenti — kompaniyaning operatsion foydasi yordamida kredit bo‘yicha to‘lanadigan foizlarni to‘lash qobiliyati

Joriy likvidlilik koeffitsiyenti — kompaniyaning mavjud aktivlar asosida qisqa muddatli majburiyatlarni to‘lash darajasi

Kraudfanding — ommaviy moliyalashtirish: jamoaviy sarmoya yoki ixtiyoriy to‘lovlar orqali loyihalarni amalga oshirish usuli

Ijodiy fikrlash — muammolarga standartdan tashqari yondashish, yangi g‘oyalar yaratish va innovatsion qarorlar ishlab chiqish qobiliyati

Kredit liniyasi — kompaniyaga bank tomonidan beriladigan oldindan belgilangan qarz limiti

Kredit reytingi — kompaniya yoki davlatning qarz majburiyatlarini o‘z vaqtida va to‘liq bajarish qobiliyatini ifodalovchi baholov tizimi