Azimov ko‘chasidagi Testo va boshqa kafelar hokim tekshiruvidan so‘ng chiroqsiz qoldi

21-aprel kuni Toshkentning Yashnobod tumanidagi Sodiq Azimov ko‘chasida joylashgan bir nechta umumiy ovqatlanish shoxobchalari, jumladan, TESTO chuchvara do‘konida elektr ta’minoti to‘xtatildi. Bu haqdagi ma’lumotni tarmoq asoschilari Zamira Rahmonova va Nargiza Ulug‘ova tasdiqladi.

Ularning so‘zlariga ko‘ra, avvalroq tuman ma’muriyati vakillari obodonlashtirish bo‘yicha bir qator talablarni e’lon qilgan: yozgi maydonni zonalashtirishni yakunlash, plitkalar yotqizish, fasadni yangilash va atrofni tartibga keltirish. Barcha ko‘rsatmalar, tadbirkor ayollarning so‘zlariga ko‘ra, rasmiy hujjatlar taqdim etilmasdan, og‘zaki shaklda berilgan.

Talablar 18-aprel kuni «Gastronomik ko‘cha» tashkil etish tashabbusi doirasida hududni ko‘zdan kechirgan Toshkent hokimi Shavkat Umurzoqovning tashrifidan ko‘p o‘tmay e’lon qilindi.

TESTO vakillari obodonlashtirish dasturida ishtirok etishga va zarur ishlarni bajarishga tayyorligini bildirdi, biroq ma’muriyatdan moliyaviy yukni hisobga olgan holda real muddatlarni belgilashni so‘radi. Shuningdek, ular rasmiy ko‘rsatmalar bo‘lmagan taqdirda elektr energiyasini o‘chirishning huquqiy asoslarini aniqlashtirmoqchi ekanliklarini ma’lum qilishdi.

Bundan tashqari, murojaatda faoliyatni to‘xtatish, mahsulotni yo‘qotish va mijozlar oqimining kamayishi bilan bog‘liq ehtimoliy zararlar masalasi ham ko‘tarilgan. Ularning ma’lumotlariga ko‘ra, xuddi shunday choralar shu ko‘chadagi boshqa kafelarga ham ta’sir ko‘rsatgan.

«Biz sayyohlik ko‘chasini yaratish tashabbusini qo‘llab-quvvatlaymiz, biroq bunday choralar faoliyat yuritayotgan korxonalarga zarar yetkazmasligi kerak, deb hisoblaymiz,» – deya ta’kidladi tarmoq asoschilari.