Toshkentda avtomobillar uchun ekostikerlar berish muddati yana kechiktirildi

Hukumat qarori bilan 2024-yil bahoridan beri ishlab chiqilayotgan “Ekologik transport” — avtomobillardan atmosferaga chiqayotgan ifloslantiruvchi moddalar tashlamalarini qisqartirish tizimini joriy etish muddatlarini yana o‘zgartirdi. Uning amalga oshirilishi endi 2026-yil 1-yanvardan boshlanishi kutilmoqda.

“Ekologik transport” tizimi:

• birinchi bosqichda (2025 — 2027-yillarda) — Toshkent shahrida;
• ikkinchi bosqichda (2028 — 2030-yillarda) — Nukus shahri va viloyatlar markazlarida hamda, zaruratga ko‘ra, alohida ekologik zonalarda (sayyohlik markazi, tabiat qo‘riqxonasi, sog‘lomlashtirish hamda dam olish maskanlari va boshqalar);
• uchinchi bosqichda (2031 — 2034-yillarda) — boshqa barcha hududlarda ishga tushirilishi rejalashtirilgan.

Avtotransportning ekologik me’yorlarga muvofiqligini baholash uchun ishlab chiqaruvchining ekologik sinf (“Yevro”) haqidagi ma’lumotlari qo‘llaniladi. Ekologik sinfga mansubligini aniqlash imkoni bo‘lmagan transport vositalarining normativlarga mosligi Ichki ishlar vazirligining “Innovatsiya loyihalari va aholiga servis xizmatlari ko‘rsatish markazi” davlat unitar korxonasi tomonidan diagnostika tekshiruvidan o‘tkaziladi va aniqlanadi.

Tashlanmalarning zararlik darajasiga qarab avtomobilga yashil, sariq yoki qizil stiker beriladi. Toshkentda avtomobilchilarga stikerlar tarqatilishi endi 2026-yil yanvaridan boshlanishi lozim, poytaxtdagi barcha mashinalarning to‘liq baholanishi esa avval belgilangan 2027-yil o‘rniga 2028-yil boshigacha yakunlanishi rejalashtirilgan.

Nukus va viloyat markazlarida avtomobillarni ekologik baholash uchun muddat 2031-yil yanvarigacha (avval — 2029-yilgacha) belgilandi. Boshqa hududlarda esa oxirgi muddat 2035-yil boshigacha (avval — 2031-yil) belgilanmoqda.