AVO Bankga yangi rahbar tayinlandi

AVO Bank’ning yangi rahbari etib avval rais o‘rinbosari bo‘lib ishlagan Dmitriy Musiyenko tayinlandi. Bu haqda Openinfo ma’lumotlarida keltirilgan.

Kadrlar almashinuvi bo‘yicha qaror joriy yil 25-noyabr kuni Kuzatuv kengashining umumiy yig‘ilishida qabul qilingan. Kun tartibida eng yuqori rahbarlik lavozimiga yangi nomzodni tasdiqlash masalasi ko‘rib chiqilgan.

2023-yil fevralidan buyon tashkilotni boshqarib kelgan Artem Popov lavozimni tark etdi. Uning ketishiga shaxsiy va professional loyihalarni amalga oshirish rejalari sabab bo‘lgani aytilgan. Qayd etilishicha, sobiq rahbar 2025-yil oxirigacha aksiyadorlar va kengash bilan hamkorlikni davom ettirib, ishlarning tizimli tarzda topshirilishini ta’minlaydi.

Bo‘sh qolgan o‘rin Dmitriy Musiyenkoga berildi. U ilgari operatsion va moliyaviy masalalarni boshqarib kelgan. Markaziy bank nomzodni rasmiy tasdiqlaguniga qadar u tashkilotni vaqtincha rahbar sifatida boshqaradi.

Korporativ sayt ma’lumotlariga ko‘ra, yangi boshqaruvchi xalqaro sohada 19 yildan ortiq tajribaga ega. Uning ish faoliyati ro‘yxatida London va Nyu-Yorkdagi Credit Suisse va Barclays bo‘linmalarida risklarni boshqarish, moliyaviy mahsulotlarni tuzish hamda treyding bilan shug‘ullangan davrlari mavjud.