Pul-kredit siyosatining 2025-2027 yillarga mo’ljallangan asosiy yo’nalishlar loyihasi belgilandi

O’zbekiston markaziy banki tomonidan 2025–2027-yillarda narxlar barqarorligini taʼminlash maqsadida pul-kredit siyosatining asosiy yoʻnalishlari belgilanib, makroiqtisodiy sharoitlar va inflyatsiyaga taʼsir etuvchi omillar hisobga olingan holda asosiy, muqobil va xatarli ssenariylar ishlab chiqildi.

Asosiy ssenariyda iqtisodiy oʻsish jarayonlari davom etishi prognoz qilinmoqda. Kelgusi yilda real YaIM oʻsishi 5,5 –6,0%, 2026-yilda 5,5-6,5%, 2027-yilda esa 6,0–6,5% atrofida boʻlishi hamda inflyatsiya darajasi 2025-yilda 6,0–7,0%ga pasayishi kutilmoqda.

Kelgusi yilda tartibga solinadigan narxlarning kutilayotgan navbatdagi oshirilishi hamda oziq-ovqat inflyatsiyasining 2024-yildagi past baza taʼsirlarini inobatga olib, inflyatsiyaning 5%lik target darajasigacha pasayishi 2026-yilning ikkinchi yarmida sodir boʻlishi boʻyicha asoslarni yuzaga keltirmoqda, — deydi Markaziy bank.

Muqobil ssenariyda esa tashqi xatarlarning kuchayishi va ichki sharoitlarning oʻzgarishi haqida ham ogohlantirilgan. 2025-yilda iqtisodiy oʻsish 5,0–5,5 foiz, 2026-yilda 5,0–6,0 foiz, 2027-yilda 5,5–6,5 foizga yetishi mumkin.

Shu bilan birga, xatarli ssenariyda iqlim oʻzgarishi va energiya resurslarining yetishmasligi inflyatsiyaga salbiy taʼsir koʻrsatishi keltirilgan. Inflyatsiya esa 2025-yilda 8–9%, 2026-yilda 7–8% atrofida kutilmoqda.