AQSH Xitoy tovarlari uchun bojlarni 104% ga oshirdi
Bunga yaqinda Xitoy hukumati Amerikaga javoban qo‘llagan 34%lik boj sabab sifatida keltirilgan

AQSH 9-aprel kuni Xitoydan olib kiriladigan tovarlarga qo‘yiladigan bojxona to‘lovlarini 104% gacha oshirdi. Bu haqda Bloomberg xabar berdi.
AQSH prezidenti Donald Tramp 2-aprel kuni 185 ta mamlakatdan import qilinadigan mahsulotlarga boj joriy etilishini aytgandi. Xitoydan keltiriladigan mahsulotlar uchun bojlar 34% darajasida belgilangan. Bunga javoban Xitoy hukumati ham shuncha miqdorda Amerika tovarlariga bojlar solgan.
Shundan so‘ng Tramp agar Xitoy hukumati javob choralaridan voz kechmasa, bojlarni 50% gacha oshirish bilan tahdid qilgan edi. Shu sababli bojlar 104% ga oshmoqda.
Oq uy matbuot kotibi Kerolayn Livittga ko‘ra, Tramp Xitoyning kelishuvga erishishga intilayotganini ko‘rmoqda.
Pekin javob choralarini qo‘llab xato qildi, agar Amerika hujumga uchrasa, u bundan ham kuchliroq zarba beradi, degan Livitt.
U agar “Xitoy qo‘l cho‘zsa, Tramp unga muruvvat ko‘rsatishga tayyor” ekanini bildirgan. AQSH prezidenti bu borada Pekindan qo‘ng‘iroq kutayotgani ta’kidlangan.
Trampning Xitoy hamda boshqa ko‘plab davlatlardan import qilinadigan mahsulotlarga bojlar joriy etish qarori dunyo bo‘ylab siyosatchilar va iqtisodchilarning keskin tanqidiga sabab bo‘ldi. Moliyaviy bozorlar esa bu xabarga indekslarning keskin pasayishi bilan javob qaytardi.
Bundan tashqari, neft narxlarining ham keskin tushib ketgani kuzatildi. Dpa agentligi xabariga ko‘ra, bu qaror global iste’mol narxlarining oshishi va iqtisodiy o‘sishning sekinlashuviga olib kelishi mumkin. Tramp tomonidan joriy etilgan yangi savdo bojlari uning hozirgacha amalga oshirgan eng tajovuzkor va keng qamrovli savdo siyosati deb baholanmoqda.
Moliya va biznes haqida ko'proq yangiliklar Telegram kanalda @KPTLUZ