Andijon viloyatida yana bir pullik avtomobil yo‘li quriladi

Andijon viloyatida yana bir pullik avtomobil yo‘lini qurish loyihasi amalga oshiriladi. Bu haqda viloyat hokimi Shuhrat Abdurahmonov ma’lum qildi.

Yangi pullik yo‘l “Yangi Andijon” shahri bilan Xonobod shahri o‘rtasida qurilishi rejalashtirilgan. Loyihani amalga oshirish bo‘yicha kelishuv Andijon viloyati hokimi Shuhrat Abdurahmonov va viloyatga xorijiy investitsiyalarni jalb etayotgan Xitoy kompaniyalari vakillari o‘rtasidagi uchrashuvda erishilgan.

Aynan shu yo‘nalishda pullik avtomobil yo‘li qurilishi haqida ilgari xabar berilmagan edi.

Joriy yil fevral oyida O‘zbekiston “Toshkent — Andijon” pullik avtomobil yo‘lining birinchi bosqichi boshlanganini e’lon qilgan edi. Loyiha davlat-xususiy sheriklik (DXSh) asosida amalga oshirilmoqda.

O‘tgan yil oktabr oyida O‘zbekiston transport vaziri o‘rinbosari Jasurbek Chorievning ma’lum qilishicha, Jahon banki bilan hamkorlikda ishlab chiqilgan “Toshkent — Andijon” pullik yo‘li qurilishi 6 yil 3 oy davom etadi. Umumiy uzunligi 314 km bo‘lgan yangi trassa I-a toifadagi olti polosali yo‘l bo‘ladi, shundan 64%i yangi yo‘laklar, 36%i esa rekonstruksiya qilinadigan qismlardan iborat.

Iyul oyida “Toshkent — Andijon” yo‘nalishidagi birinchi pullik avtomobil yo‘li qurilishi 2026-yilda xalqaro avtomagistrallarni modernizatsiya qilish strategiyasi doirasida boshlanishi ochiqlandi. 314 km uzunlikdagi loyiha 49 yil muddatli davlat-xususiy sheriklik asosida amalga oshiriladi.

Loyihaning qiymati $4,28 mlrd deb baholanmoqda. Yangi olti polosali trassa 10 dan ortiq tonnelni o‘z ichiga oladi va Toshkent bilan Andijon o‘rtasidagi yo‘l vaqtini ikki soatdan ortiq qisqartiradi.