O‘zbekistonda aloqa operatorlariga xalqaro internet-kanallarga bevosita ulanish huquqi beriladi

Vazirlar Mahkamasi O‘zbekistonda telekommunikatsiya bozorini liberallashtirishga oid qaror qabul qildi. Hujjat Lex.uz saytida e’lon qilindi.

Unga ko‘ra, respublikada faoliyat yuritayotgan mobil va simli aloqa operatorlariga tajriba tariqasida o‘z tijorat ehtiyojlari uchun xalqaro internet-kanallarga bevosita ulanish huquqi beriladi. Eksperiment 2030-yil 1-yanvargacha davom etadi.

Operatorlarning tashqi kanallarga ulanishini tartibga solish vazifasi Raqamli texnologiyalar vazirligiga yuklatildi. Ishchi organ sifatida Telekommunikatsiya tarmoqlarini boshqarish respublika markazi qayd etilgan.

2028-yil 1-iyulgacha Raqamli texnologiyalar vazirligi va boshqa davlat organlariga JST talablari hamda aloqa texnologiyalari rivojlanishini inobatga olgan holda internet-kanallarga ulanishning takomillashtirilgan tartibini ishlab chiqish topshirildi.

Qaror bilan, shuningdek, operatorlarning tashqi kanallarga to‘g‘ridan-to‘g‘ri ulanishi uchun vaqtinchalik talab va shartlar ro‘yxati tasdiqlandi. Jumladan, kompaniyaning optik tolali tarmoqlari O‘zbekiston hududining kamida 50% ini qamrab olishi kerak.

Eksperimentda ishtirok etish uchun operatorlar TTBRM bilan shartnoma tuzishi lozim. Buning uchun quyidagi hujjatlar to‘plami taqdim etiladi:

• tarmoq va xalqaro ulanishlar sxemasi;
• tarmoqni rivojlantirish bo‘yicha istiqbol rejalari;
• tashqi internet-kanalga ulanish uchun shlyuz loyihasi;
• shlyuz rahbariyati va xodimlari haqida ma’lumotlar.

Bundan tashqari, loyiha Raqamli texnologiyalar vazirligi, Elektron texnologiyalarni rivojlantirish markazi, Davlat xavfsizlik xizmati va Ichki ishlar vazirligining Kiberxavfsizlik markazidan ekspert xulosasini olishi kerak bo‘ladi.

Taqdim etilgan hujjatlar mazkur organlar tomonidan 15 ish kuni ichida ko‘rib chiqiladi. Ijobiy xulosa berilganda, RTsUST 3 ish kuni ichida eksperimentda ishtirok etish bo‘yicha shartnoma loyihasini tayyorlaydi. Operator esa uni 5 kundan kechiktirmay imzolashi shart.