Ai-80 benzinidan voz kechish inflyatsiyani kuchaytirishi mumkin — Markaziy bank

Ai-80 benzini ishlab chiqarish va realizatsiyasining to‘xtatilishi mamlakatdagi inflyatsiya darajasiga bevosita ta’sir ko‘rsatadi. Bu haqda 11-sentabr kuni bo‘lib o‘tgan matbuot anjumanida Markaziy bank raisi Timur Ishmetov ma’lum qildi.

Uning aytishicha, ushbu omil allaqachon yangilangan prognozlarda inobatga olingan. Yil yakuniga borib inflyatsiya darajasi 8,7% atrofida shakllanishi kutilmoqda. Bu esa yil boshida kutilgan (7–8%) va birinchi chorak yakunlari bo‘yicha prognoz qilingan (8%) ko‘rsatkichlardan yuqoriroqdir.

Umuman olganda, inflyatsiyaga oshiruvchi ta’sir ko‘rsatuvchi tovarlar va omillar orasida benzin ham bor. O‘rta muddatli istiqbolda bu biz uchun xavotirli yo‘nalishlardan biridir, — dedi u.

Markaziy bank raisining qayd etishicha, Ai-80 benzinining taqdiri nafaqat joriy narxlarga, balki aholining kelajakdagi o‘zgarishlarga munosabatiga ham ta’sir o‘tkazmoqda.

Eng muhimi, bu inflyatsiyadan tashqari, aholining inflyatsion kutilmalarida asosiy omillardan biri hisoblanadi, — deya ta’kidladi Markaziy bank raisi.

Eslatib o‘tamiz, “O‘zbekneftgaz” 2-sentabrdan boshlab Ai-80 markali benzinni birja savdolarida sotishni to‘xtatdi. Bu qadam prezidentning 2025-yilgacha bo‘lgan davlat dasturi doirasidagi topshiriqlarni amalga oshirishning bir bo‘lagi bo‘lib, unga ko‘ra, bosqichma-bosqich yuqori oktanli, jumladan Ai-92 markali benzin ishlab chiqarish va sotishga o‘tilishi belgilangan.