O‘zbekiston aholisining umumiy daromadlari 825,3 trln so‘mga yetdi

O‘zbekiston aholisining umumiy daromadlari 9 oy davomida 825,3 trln so‘mga yetdi, deya ma’lum qildi Milliy statistika qo‘mitasi.

Aholi jon boshiga umumiy daromadlar 21,8 mln so‘mni tashkil etdi, bu real ifodada 2024-yilga nisbatan 6,3% ga ko‘pdir.

Hududlar kesimida vaziyat deyarli o‘zgarmagan. Eng yuqori ko‘rsatkichlar Toshkent shahri (52 mln so‘m), Navoiy (32 mln), Buxoro (25,9 mln) va Toshkent (21,9 mln) viloyatlarida qayd etilgan. Respublika bo‘yicha o‘rtacha ko‘rsatkichdan pastroq darajalar Qoraqalpog‘istonda (14,9 mln), Namangan (15,8 mln), Jizzax va Qashqadaryo (har biri 17 mln so‘m) viloyatlarida kuzatilgan.

Real o‘sish sur’atlari ham hududlar bo‘yicha farq qilmoqda: poytaxtda aholi jon boshiga umumiy daromadlar hajmi 10,3% ga oshgan bo‘lsa, Toshkent viloyatida bu ko‘rsatkich atigi 3,3% ni, Andijon viloyatida — 1,1% ni, Qoraqalpog‘istonda esa — 2,2% ni tashkil etgan.

Mehnat faoliyatidan olingan daromadlarning ulushi o‘tgan yilgi 62,8% dan 59,9% gacha kamaygan. Bu aholi umumiy daromadlari tarkibida asosiy ulush transfertlar (pensiyalar, nafaqalar va pul o‘tkazmalari) hisobiga ko‘chayotganini anglatishi mumkin.

Ijtimoiy transfertlar tarkibida pensiyalar asosiy ulushni — 84,6% ni tashkil etadi. Nafaqalar ulushi 13,6%, stipendiyalarniki esa 1,8% ga teng.

2025-yilning yanvar-sentabr oylari ma’lumotlariga ko‘ra, transfertlardan olingan daromadlarning o‘tgan yilning mos davriga nisbatan nominal o‘sish sur’ati 122,2% ni tashkil etdi. Bu hisobot davrida aholi daromadlarining eng tez o‘suvchi manbai bo‘ldi. Bunday o‘sish pensiya va nafaqa to‘lovlari hajmining oshishi, shuningdek, chet eldan kelayotgan shaxsiy pul o‘tkazmalari oqimining saqlanib qolayotganini ham ko‘rsatadi.

Materiallarda qayd etilishicha, aholi daromadlari tarkibida mehnat faoliyati (ya’ni yollanma ishchilar va o‘zini o‘zi band qilganlar) ulushi 2024-yilgi 62,8% dan 59,9% gacha pasaygan. Shu bilan birga, kichik tadbirkorlikdan tushgan daromadlar jami hajmning 57,9% ini tashkil etgan (o‘tgan yilda — 58,5%).

Mustaqil ravishda band bo‘lishdan olingan daromadlar 15,3% ga, yollanma ishchilar daromadlari esa 21,7% ga oshgan. Har ikki tarkibiy qism jami nominal daromad o‘sishining taxminan 5% ini ta’minlagan.

Mol-mulkdan olingan daromadlar ulushi hanuz kichik bo‘lib, 3,3% ni (o‘tgan yilda — 3,5%) tashkil etmoqda. Shaxsiy iste’mol uchun o‘zida ishlab chiqarilgan xizmatlardan olingan daromadlar ulushi esa 6,6% ga (o‘tgan yilda — 7,2%) teng.

Kapital.uz avvalroq Oʻzbekistonda oʻrtacha oylik ish haqi 6,17 mln soʻmga yetgani haqida xabar bergandi. Eng yuqori daromadlar Toshkentda va bank sohasida, eng pastlari esa Qashqadaryo hamda sogʻliqni saqlash tizimida qayd etilgan.