Toshkentda yong‘in xavfsizligi talablari buzilgani sabab 7 ta savdo markazi vaqtincha yopildi

Toshkent shahrida odamlar ko‘p to‘planadigan bino va inshootlarda yong‘in xavfsizligi talablariga rioya etilishi bo‘yicha tekshiruvlar o‘tkazildi. Bu haqda shahar Favqulodda vaziyatlar boshqarmasi matbuot xizmati ma’lum qildi.

Davlat yong‘in nazorati xodimlari tomonidan olib borilgan reydlar natijasida Mirzo Ulug‘bek, Chilonzor, Yakkasaroy, Yangihayot, Yunusobod va Yashnobod tumanlarida joylashgan 7 ta obyekt faoliyati vaqtincha to‘xtatildi.

Tekshiruvlar davomida aniqlangan qo‘pol qoidabuzarliklar tashrif buyuruvchilar va xodimlar hayoti hamda sog‘lig‘i uchun xavf tug‘dirgani sababli ushbu choralar ko‘rildi.

Mazkur savdo markazlarining faoliyati barcha kamchiliklar to‘liq bartaraf etilgunga qadar cheklanadi. Hozirda obyekt egalari yong‘in xavfsizligi talablariga muvofiqlashtirish bo‘yicha ishlarni olib bormoqda.

Keng ko‘lamli tekshiruvlar Yashnobod tumanida joylashgan “Aviator” savdo markazida 31-yanvar kuni sodir bo‘lgan yong‘indan so‘ng boshlangan.

Mazkur holat yuzasidan Bosh prokuratura tomonidan mansab vakolatlarini suiiste’mol qilish va yong‘in xavfsizligi qoidalarini buzish moddalarida jinoyat ishi qo‘zg‘atilgan.

Favqulodda vaziyatlar vazirligi respublika bo‘ylab savdo markazlari, restoranlar va xizmat ko‘rsatish obyektlarida ham tekshiruvlar davom ettirilishini bildirdi. Talablarga jiddiy zid holatlar aniqlangan muassasalar kamchiliklar bartaraf etilmaguncha yopiladi, mas’ullar esa javobgarlikka tortiladi.