Surxondaryoda 3 ta yangi sayyohlik markazi tashkil etiladi

Surxondaryoning tog‘li hududlarida turizm infratuzilmasini yaxshilash maqsadida 3 ta turistik ob’yektlar quriladi. Bu haqida Prezident qarori qabul qilindi. 

Qarorga ko‘ra, Boysun tumani hududida 220,5 gektar maydonda “Omonxona” turistik markazi, Sariosiyo tumani hududida 615 gektarlik “Sangardak” turistik markazi va Jarqo‘rg‘on tumanidagi “Oqtepa” suv omborining qirg‘oq bo‘yi hududidagi 110 gektar yer uchastkasida “Obihayot” turistik markazi tashkil qilish rejalashtirilgan. 

“Omonxona”, “Sangardak” va “Obihayot” turistik markazlarini rivojlantirish va boshqarish maqsadida davlat muassasasi sifatida maxsus tashkilot – Turizm infratuzilmasini rivojlantirish va boshqarish direksiyasi tuziladi.

Shuningdek, turistik markazlar hududlarida tadbirkorlik va shaharsozlik faoliyatini amalga oshirish uchun mo‘ljallangan bo‘sh yer uchastkalari mulk huquqi yoki ijara huquqi asosida elektron onlayn auksion orqali realizatsiya qilinadi. 

Xususiy investisiyalarni jalb qilgan holda 2025–2027 yillarda mehmonxonalar, oilaviy mehmon uylari, xizmat ko‘rsatish majmualari va dam olish maskanlarini qurish maqsadida bo‘sh yer uchastkalari 10 yil muddatda teng ulushlarda bo‘lib-bo‘lib to‘lash sharti bilan elektron onlayn auksion savdolariga chiqariladi.