O‘zbekistonda 183 turdagi tovarlar uchun import bojlari kamaytiriladi

O‘zbekistonda turli tovarlarning qariyb 200 turini import qilishda to‘lov stavkalarini pasaytirish rejalashtirilmoqda. Bu haqda bosh vazir o‘rinbosari Jamshid Xo‘jayev eksportyorlar bilan o‘tkazilgan uchrashuvda ma’lum qildi.

Ma’lum qilinishicha, tashqi iqtisodiy faoliyat tovar nomenklaturasidagi 203 ta kod o‘rganilmoqda va ularning 183 tasi bo‘yicha boj stavkalarini kamaytirish ko‘zda tutilgan.

Masala Surxondaryo viloyatidagi Brightly Mega Water korxonasi muammosi sabab ko‘tarilgan. Korxona mevalarni qayta ishlash uchun Xitoydan zamonaviy qadoqlash qutilari import qilayotganini, ammo mamlakatda bunday mahsulot ishlab chiqarilmasa-da, ular 20% boj bilan olib kirilayotganini bildirgan. Shu bilan birga, Tetra Pak turidagi qadoqlar bojdan ozod etilgani qayd etilgan.

Jamshid Xo‘jayev bojxona qo‘mitasiga tadbirkor bilan muzokara o‘tkazish va agar mahsulot mahalliy ishlab chiqarilmasa, uni imtiyozli stavkalar ro‘yxatiga kiritish bo‘yicha topshiriq berdi.

Avvalroq prezident Shavkat Mirziyoyev sanoat uchun zarur xomashyolar importiga qo‘llaniladigan bojlarni qayta ko‘rib chiqish vazifasini qo‘ygan edi. Xususan, zargarlik sanoati uchun qimmatbaho toshlar, metallurgiya uchun issiqqa chidamli bo‘yoqlar hamda oziq-ovqat ishlab chiqaruvchilar uchun sitrus konsentratlari bo‘yicha takliflar ishlab chiqilmoqda.