11-fevraldan metan zapravkalar odatiy rejimda ish boshlaydi — Energetika vazirligi

Energetika vazirligi 11-fevral, chorshanba kuni soat 09:00 dan e’tiboran metan zapravkalar odatdagi ish rejimiga qaytishini ma’lum qildi.

Qayd etilishicha, barcha hududlarda, jumladan, vodiy viloyatlarida ham metan zapravkalar bosqichma-bosqich odatdagi rejimda faoliyat yurita boshlaydi.

Avvalroq vazirlik 2-fevraldan metan zapravkalar soat 10:00 dan 16:00 gacha faoliyat yuritishini e’lon qilgandi.

Idora axborotiga ko‘ra, Farg‘ona vodiysida metan zapravkalarning ish vaqti hokimliklar bilan kelishilgan holda, gaz bosimidan kelib chiqib belgilangan.

Shu bilan birga, ijtimoiy soha obyektlariga xizmat ko‘rsatuvchi maxsus texnika va jamoat transportlari uchun gaz ta’minoti cheklovlarsiz, barqaror tarzda ta’minlanishi qayd etilgandi.