ITIM 2025-yilda O‘zbekistonda YaIM 7,5% ga o‘sishini prognoz qilmoqda

Iqtisodiy tadqiqotlar va islohotlar markazi keyingi yil uchun O‘zbekiston iqtisodiyoti o‘sishi bo‘yicha prognozni oshirdi. Bu haqda tashkilotning analitik hisobotida ma’lum qilindi.

Mutaxassislar prognoz yaxshilanishini ichki talabning kengayishi, eksport faolligining ortishi hamda investitsiyalar ko‘payishi bilan bog‘lashmoqda. Yangilangan prognoz 2025-yil uchun iyun oyidagi baholardan 0,8% yuqori. YaIM o‘sishining kutilayotgan diapazoni 7,3–7,7% darajasida belgilangan.

Joriy ko‘rsatkichlar biznes faolligining yuqori ekanini ko‘rsatmoqda, oktabr oyida tegishli indeks o‘tgan yilning shu davriga nisbatan 34,2% ga oshgan. To‘qqiz oy davomida respublika iqtisodiyoti 7,6% ga o‘sgan. O‘sishning asosiy drayverlari sanoat, xizmat ko‘rsatish sohasi, qishloq xo‘jaligi va qurilish bo‘ldi. Tashqi savdo aylanmasi qariyb chorak qismga oshdi, eksport esa uchdan birga ko‘tarildi, investitsiyalar oqimi 15% ga yetdi. Pul o‘tkazmalari hajmi 25% ga oshdi.

Hisob-kitoblarda real vaqt rejimida tahlil qilish imkonini beruvchi “nowcasting” modeli qo‘llanilgan. Jumladan, Google qidiruv tizimidagi so‘rovlar kabi xulq-atvor omillari ham inobatga olingan: yil boshidan avtomobilsozlik, biznes va moliya yo‘nalishlariga qiziqish ortgani qayd etilgan.

Tashkilot ma’lumotlariga ko‘ra, xalqaro moliya institutlari ham ijobiy baho bermoqda. Xalqaro valyuta jamg‘armasi O‘zbekiston iqtisodiyoti 7,3% o‘sishini, Osiyo Taraqqiyot banki — 6,6%, Jahon banki esa 6,2% darajasida prognoz qilmoqda.