O‘zbekiston BP kompaniyasini Ustyurt mintaqasida mahsulot taqsimotiga oid bitimga kiritish masalasini muhokama qilmoqda

O‘zbekiston transmilliy neft-gaz kompaniyasi BP (British Petroleum) bilan Ustyurt hududi bo‘yicha mahsulotni bo‘lishish to‘g‘risidagi bitim (PSA)ga uning qo‘shilishi masalasida muzokaralar olib bormoqda. Bu haqda energetika vaziri Jo‘rabek Mirzamahmudov Report axborot agentligiga bergan intervyusida ma’lum qildi.

Energetika vazirining ta’kidlashicha, ilgari asosan gaz qazib olingan Ustyurt hududida neft qazib chiqarish “mintaqadagi eng istiqbolli yo‘nalishlardan biri” hisoblanadi. Mavjud ma’lumotlarni o‘rganganidan so‘ng, Ozarbayjonning davlat kompaniyasi SOCAR neft zaxiralarini aniqlash bo‘yicha razvedka ishlariga qiziqish bildirgan. Allaqachon imzolangan PSA doirasida zaruriy shartnomaviy muzokaralarni olib boradigan operator tashkil etilgan.

Energetika vazirligi, SOCAR va “O‘zbekneftgaz” ishlarni jadallashtirishni maqsad qilgan. Tomonlar 2025-yil oxiriga qadar 3 ming pogon kilometrdan ortiq hajmdagi seysmik tadqiqotlarni boshlashni, keyin esa ularning natijalariga ko‘ra ilk quduqni burg‘ilashni rejalashtirmoqda.

Mirzamahmudovning aytishicha, ulushlar taqsimoti standart bo‘lib, davlat va investorlar o‘rtasida 50/50 nisbatda bo‘linadi. Investorlar sifatida SOCAR va “O‘zbekneftgaz” ishtirok etmoqda. BP kompaniyasi ham ushbu loyihaga qiziqish bildirgan va u bilan dastlabki muzokaralar olib borilmoqda. Barcha tijoriy shartlar — qazib olingan mahsulotni bo‘lishish, soliqqa tortish va boshqa jihatlar — bitimda allaqachon belgilangan.

24-iyul kuni O‘zbekiston va SOCAR Ustyurt platosida mahsulotni bo‘lishish to‘g‘risidagi bitimni imzoladi. Unga ko‘ra, seysmik tadqiqotlar, geologik-qidiruv ishlari hamda uglevodorodlarni qazib olish amalga oshiriladi. PSAning amalga oshirilishi O‘zbekistonning neft importiga bo‘lgan ehtiyojini to‘liq yopishga va ichki bozorni 25 yil davomida neft bilan ta’minlashga imkon beradi.

Loyiha uch bosqichda amalga oshiriladi va taxminan $2 mlrd miqdorida investitsiyalar jalb qilinadi. Konning prognoz qilingan zaxiralari 100 mln tonna neft va 35 mlrd kub metr tabiiy gaz sifatida baholangan. Ustyurt platosida yillik neft qazib olish hajmi 5 mln tonnaga yetishi kutilmoqda.

Sentyabr oyida Shavkat Mirziyoyev Ustyurt platosida 6,5 ming metr chuqurlikda yirik gaz zaxiralari topilgani haqida ma’lum qilgan edi. Bu holat O‘zbekiston sanoati tarixida birinchi marta kuzatilgan.